જયારે વરસાદની ઋતુમાં કેડીઓ ઘાસ, કુડા-કચરા ઈત્યાદીથી ઢંકાય જાય છે તથા વપરાશના અભાવે પથ અગોચર બની જાય છે ત્યારે ખરો માર્ગ કયો છે એ ખોળી કાઢવું અઘરું બની જાય છે. તેવી જ રીતે વર્તમાન સમયમાં વૈદિક ગ્રંથોની શિક્ષાના અભાવે તથા મનોકલ્પનાઓને જ સત્ય ગણનાર સમાજ માટે આધ્યાત્મિક પ્રગતિનો વાસ્તવિક માર્ગ એક જટિલ કોયડો બની ગયો છે. સમયાંતરે અનેક ભળતા માર્ગો પણ ઉપજી આવ્યા છે. પરંતુ શું આ બધા માર્ગો આપણને પરમ લક્ષ્ય સુધી પહોચાડી શકે? શું જેટલા મત તેટલા પથ છે અને બધા પથો એક જ જગ્યા એ જાય છે? ના. ઉપરાંત આ સંઘર્ષમય કળીયુગમાં ભક્તિમાર્ગ પણ લાખો કાંટાઓ-અવરોધો ગ્રસ્ત થયેલ છે. આ પરિસ્થિતિઓમાં શુદ્ધ ભક્તિનું જ્ઞાન હોવું અસંભવ બની ચુક્યું છે. શ્રી ચૈતન્ય મહાપ્રભુએ કૃપા કરીને આ ભક્તિપથને ઉજાગર કર્યો છે તથા શ્રીલ ભક્તિવેદાંત સ્વામી પ્રભુપાદે તેને વિશ્વભરના લોકો માટે સુલભ બનવ્યો છે. તો ચાલો, ભક્તિપથ પર ભક્તોના સંગમાં આગળ વધીએ અને જીવનની સર્વોચ્ચ સફળતા પ્રાપ્ત કરીએ.
